Vaega 1: O le Si'omia pea o i Tatou e Taimi ua Mavae

Tusia: John Enright

Fa'aliliuina: Eti Sa'aga

E maitauina e so'o se tasi a ua lava sona taimi i Amerika Samoa le fa'apitoa ma le ese lava o nei motu mai i isi motu ma atunu'u uma. O a tonu lava itu e ese mai ai Amerika Samoa

Muamua, o le matagofie va'aia o ona laufanua e atagia mai e atumauga lanu lau'ava, e o'o i le matalasi o ona talafatai. O le itu lona lua, o le mautu o ona tagata i o latou soifuaga masani, lea ua lauiloa ai Samoa i le latou fa'aaloalo ma le tali malo masani, ae maise ai le latou mitamitaga teu fatu i le latou lava gagana ma a latou aga i fanua teu loto. O le itu lona tolu, o le maua fa'atasi ai lea o lalolagi e lua--le televave o le olaga fa'aona po nei i le itu tau fefa'ataua'iga ma atunu'u i fafo, ma le faifai malie o le soifuaga masani tau aiga ma nu'u&emdash;lea e maua uma i se nofoaga e tasi i le taimi e tasi.

Ae o le itu pito i taua lava o lo'o i ai, o le fa'afailelega lea o le tulaga ua i ai nei Amerika Samoa mai le fa'asolopito o mea fa'apitoa na tutupu i tausaga ua mavae.

O tulaga va'ai e pei ona i ai nei, o Samoa o se nofoa'ga mai anamua, ae maise ai o se nofoaga sa nofoia ni ulua'i tagata sa latou fa'ato'aina le laufanua ma le lau 'ele'ele mo le tolu afe tausaga. O se nofoaga ua tasi ai ona laufanua ma tagata sa latou fa'atamataneina, ma ua le mafai ona tu'u vaevaeina. O se nofoaga fo'i ua tofutofusia ona lau'ele'ele ma lona lava igoa, ma o igoa fo'i ia sa tu'u fa'asolo mai lea tupulaga i lea tupulaga, ma o lo'o i ai fo'i le tala'aga atoa o lo'o aofia ma na mafua ai ma le igoa. O se nofoaga ua liua o latou tua'a, ma ua avea ai ma tala fa'asolopito ma ua fai ona pine fa'amau ma mata'iga e pei o Fatumafuti.

E ui ina ua puipui malu ni isi tala fa'asolopito ma agaifanua a Amerika Samoa i lana aganu'u tu'u fofoga, fa'apea ma tala'aga tusitusia, peita'i, o le pine fa'amau o mea ua mavae o se molimau lea o mea o lo'o tutupu i aso nei, ma o lo'o si'omia ai i tatou i aso uma lava. Ua fa'apena agaifanua ma aganu'u i le fa'asamoa.

Ua tatau la ona tatou fa'atauaina ma puipui malu i ai. E fa'apena fo'i ona tatou fa'atauaina ma puipui malu i ona tulaga maota ma isi mai anamua, o mea o lo'o i ai, fa'apea ma fale o lo'o i ai ia nofoaga. E le gata i lea, ae 'o itumalo o lo'o latou puipui malu ma u'umau i ia nofoaga, e tatau ona fa'asaoina ma lagolagoina.

O le alagatatau lea o le fa'asaoina ma le puipuia o agaifanua i totonu o Amerika Samoa--ina ia mafai ai ona fa'atumau pea le matalasi ma le taua o nei motu. O le a avea fo'i lea ma ala o le a tumau ai pea le fa'amalumaluga ma le tamaoaiga o le soifuaga o Samoa mai anamua.

O lea tala'aga e loloto. O ia alagamanuia fa'asolopito ua tu'u'a'ao mai i le tolu afe tausaga o nofoia e tagata soifua lau'ele'ele ia, o lo'o tumau ma o lo'o i ai pea i nofoaga 'ese'ese i totonu o le Teritori. Na i ai pea mai le amataga, e aofia ai nofoaga mai anamua e pei o le Faga o lo'o i Ta'u ma A'a o lo'o i Tutuila, e o'o i le tulaga mai le Taua Lona II o le lalolagi e aofia ai le Blunts Point ma Breaker's Point.

O isi nofoaga e i ai le Maota o le Malo fa'apea ma le a'oga a tama'ita'i i Atauloma e iloa gofie lava i le va'ai. O isi nofoaga o lo'o i ai tulaga mata'iga mai aso anamua ua tanumia i le palapala, ma e mafai lava ona maua pe iloa gofie fo'i e tagata atamamai o lo'o latou su'esu'eina tulaga fa'apea.

O isi tulaga fa'apea, e vave lava ona fa'aleagaina ona o le suaina o le palapala, po'o le fa'aaogaina fo'i o le 'ele'ele e fausia ai maota, laoa ma fale o tagata. O le fa'apopolega, afai o le a fa'aleaogaina pe suaina nei nofoaga, e le toe mafai ona toe fa'atula'i mai. Ma o mataupu taua la mo lo tatou soifuaga mai anamua ua le toe maua ma ua motusia.

I le toe fa'atula'i mai ma le toe fafagu o measina ia a Samoa mai anamua i lona taua ua ala ai ona fa'avaeina le Ofisa Fa'asao o Measina a Samoa i totonu o le Malo o Amerika Samoa. O lea ofisa sa fa'avaeina i le tausaga 1970.

O le matafaioi a le ofisa autu lenei o le puipuia mai lea o measina ia a Samoa anamua mai le fa'aleagaina po'o le fa'atalale. E le gata i lea, o le puipuia o tu ma agaifanua a Samoa mai anamua i totonu o le teritori. O lenei puipuiga ua aofia fa'atasi ai tulaga uma mai anamua o lo'o i totonu o laufanua a le Malo, fa'apea ma laufanua faitele.

I le tu'ufa'atasiga o lenei tuistusiga o le a tatou taga'i ai i tulaga 'ese'ese ma le tu'ufa'atasiga o measina ia a Samoa mai anamua, o lo'o maua i totonu o Amerika Samoa. E le gata i le mo le silafia o ia tulaga, ae o le a talanoaina ai fo'i auala uma e ao ona faia e mafai ai ona puipuia atili ia tulaga mai le fa'atamai'ina.

* * *

Vaega 2: Fa'amaoniga o Tua'a ua Mavae.

Tusia: John Enright

Fa'aliliuina: Eti Sa'aga

O le tulaga pito i leva o tala'aga fa'asolopito i totonu o Ameirka Samoa o lo'o tanumia ma ufitia i le 'ele'ele fa'apea togavao. I le fa'auigaina e le lomi fefiloi o le toe sailia o nei tulaga, o lo'o ta'ua mai ai o se fa'asaienesi lea e su'esu'eina ai mea na totoe mai anamua, ma e maitauina ma mautinoa ai le tala'aga o soifuaga o tagata, ae maise mea masani sa latou faia i aso ua mavae. O ia tulaga uma, e mafai ona maua i lalo o le palapala ma le lavelave o le ufitia o togavao, ma e tatau lava ona su'esu'e malie i se auala ia 'aua ai ne'i afaina pe fa'aleagaina ai o latou tulaga ma'ale'ale.

O se fa'asaeanisi faigata, umi, toe tele le taimi e alu ai, aua e fai o le lagalaga ma 'eli'eli malie a'e o nei tulaga mai anamua, ae o le auiliili fo'i ma le tigaina i le fa'aputuina o fa'amaumauga atoatoa uma e tusa ai ma mea ta'itasi uma o lo'o maua a'e. O se sa'ili'iliga e alu se taimi umi o fai. O su'esu'ega o lo'o faia i nofoaga i Amerika Samoa ua i le tulaga amata nei o le fa'aputuputuina ma iloiloina o fa'amatalaga uma o nei nofoaga. E ui la ina e fa'apea o lea fa'ato'a amata, ua lava ma totoe fa'amaumauga ua i ai i le taimi lenei e maua ai si na ata manino o le na o se vaega o le soifuaga atoa o Samoa sa i ai i taimi ua mavae.

O se manatu lata mai fa'asaienesi e fa'apea o tagata muamua lava na fa'a'ainaina motu o le atu Samoa na taunu'u mai pe a ma le 3,000 tausaga talu ai. O ni tagata pito i maoa'e le atamamai i le folau ma le fai faiva nei tagata, ma sa fa'asolosolo mai le latou folauga mai le itu i sasa'e (lea e i ai le atu motu o le Admiralty Isalands) i le itu i matu o Niu Kini tusa ma le 3,000 maila le mamao. Ua iloa ma fa'amaonia lea manatu ona o ni itu'aiga ipu 'ele ua fa'aigoaina o Lapita na latou au maia.

O lenei pine fa'amau fa'asaienesi e foliga mai ai o nei tagata folau na latou 'ainaina nu'u i le talafatai o atu motu 'ese'ese a'o latou folau fa'asolo mai aga'i i sisifo. E tapula'a le iloa ma le malamalama i nei nu'u anamua ona e tele le galuega i le toe 'eliina i luga e faia. Ae o su'esu'ega sa faia i To'aga i Ofu ma Aoa i Tutuila, ua iloa ai mea totino sa fa'aaogaina e ulua'i Samoa i le latou soifuaga i aso ta'itasi&emdash;o ipu 'ele, to'i ma'a, tioata mai ma'a o mauga mu, matau fagota e faia mai atigi figota, fa'apea ai ma mea teu tino e i ai taulima, 'asoa ma isi, fa'atasi ai ma mea faigaluega sa fa'aaoga i le fauina o nei mea.

O mea nei e maua latalata lava i luga o le palapala, ma na fa'aaogaina talu ai nei e tagata a o le'i o'o mai i taimi o le malamalama. O tala tu'u fofoga e iloa ai o se vaitaimi o taua ma fevaevaea'iga lea vaitaimi, ma o mea ua maua mai le tanumia e le laufanua ua lagolagoina ai lea talitonuga. O pa ma 'olo puipui, lea e tele ina maua i vaega maualuluga ma autafa o mauga, ua iloga ai le vaitaimi tonu lea. O nei 'olo sa fa'aaogaina e malu ma sulufa'i i ai i latou e le'i a'afia i taimi o taua, ma sa fa'aaogaina fo'i e 'au tau e sulu i ai pe a mana'omia.

I taimi o le filemu na mulimuli mai i le taimi o fevaevaea'iga, sa nofoia ai e tagata Samoa nu'u; ma o le tele o nei nu'u i Amerika Samoa sa tu matafaga ma lata i le sami. O le tele fo'i o nei nu'u o lo'o i ai pea lava e o'o mai i le aso nei. I ni isi la o nei nu'u, o lo'o i ai pea pine fa'amau o aso mai anamua, ae o le tele o isi nu'u, ua tanumia uma tulaga o le soifuaga i aso anamua i lalo o le palapala.

O nofoaga iloga o le soifuaga fa'asolopito i Malota ma Fagatele i le motu o Tutuila, ma Faga i Ta'u, ua talitonuina o ni nu'u mai lava i le vaitaimi anamua lea, ma o o latou taua i lea tulaga ua mafai ai ona fa'atuina o latou igoa mo le resitaraina i fa'amaumauga aloa'ia o Nofoaga Taua Fa'asolopito a le Iunaite Setete. O le ta'atiaga masani e iloga ai se nu'u i le fa'asamoa, o le i ai lea o se malae e si'omia e maota ma laoa, fale nonofo i tua atu, ae pito lava i tua faleo'o ma umu.

O le pine fa'amau mulimuli pito iloga o taimi o le fa'asolopito, o tia seulupe ia, lea ua fa'aigoaina i le fa'aperetania o fa'afetu maupu'epu'e. O nei tia e tele lava ina fausia i ma'a ma 'ala, ma a le tasi e sili atu fo'i 'ave e oso aga'i fafo mai le mapu'e ogatotonu. O le fa'agatama a ali'i o le seu lupe na fa'aaogaina tele ai nei tia, ma sa tele ina fausia i le malifa o laufanua, ae fa'aoso ave aga'i i totonu o le vao matua po'o le toga vao. O se tasi o nei tia o lo'o ua puipuia ma fa'asaoina nei i Tafuna, e soso'o ane lava ma Fatuoaiga, ma o lo'o tatala mo le maimoa ma le silafia a tagata lautele. O fa'amatalaga uma e uiga i le tia ma lona tulaga i le masani a Samoa anamua, fa'apea fo'i ma le tala'aga o le ta'aloga o le seuga lupe o lo'o lomia uma ai mo le silafia a le atunu'u ma e asiasi.

O se va'aiga fa'anatinati lea i tulaga tanumia o le measina ma le fa'asolopito o Samoa anamua i Amerika Samoa. E tasi le mea e mautinoa, o le tele lea o le tamaoaiga i itu tau measina mai aso anamua o lo'o tanumia ma ufitia pea i totonu o Amerika Samoa, mai lava i le 3,000 na fa'ato'a 'aina ai nei motu e o tatou ulua'i tua'a. O le tulaga lea e tatau ai lava ona fa'aetete i so'o se ituaiga galuega lava e mana'omia ai le matua'i suaina po'o le 'eliina o le elelele.

* * *

Vaega 3: Papalagi

Tusia: John Enright

Fa'aliliuina: Eti Sa'aga

O se manatu fa'asaienesi o lo'o i ai nei e fa'apea ina ua 'aina le atu Samoa ma Toga pe tusa ma le 3,000 talu ai, sa le'i i ai se isi toe folaga tele i isi motu i sisifo atu mo le isi 1,000 tausaga. Na mamao tele le vasa sa folau mai ai, ma sa le pine le matagofie o nei motu tu'ufua ina ua taunu'u mai. E fai o le uluola o mea toto i le laufanua, ae o le tele ma le tamaoaiga o le sami si'omia, na maua ai se soifuaga filemu ma le solo lelei. Ae sa le nofonofo a'i ai. O le masani e folau ma le agaga tauivi o le vasa na fa'aauau ai pea e ni isi o tua'a ia folauga, ma fa'ato'a ai isi atu motu tua'oi o le atu Polenisia. E ui lava la na fa'apea e va i vasa nei motu, ae sa feso'ota'i pea i taimi i se fa'a'aiga e ala atu i folauga.

E matua tamaoaiga lava tala o le vavau ma alaga'upu fa'asamoa i folauga fa'apea ma feso'ota'iga a Samoa ma isi motu o le atu Polenisia, lea e a ma le 15 miliona sikuea maila o le vasa laolao o lo'o aofia ai. O nei feso'ota'iga na faia ma isi fo'i tagata e pei lava o i latou - i atu motu na latou folau atu i ai ona o faiga faiva, fefa'ataua'iga, po'o le fa'atafea fo'i i va'a e pei lava o va'a na latou fa'aaogaina. O tagata na fa'atafea mai sa talia lava, fa'apea fo'i ma e sa folau mai, e tusa ai ma aga masani i ia ona po.

E tusa la ma le 2,800 tausaga o fai pea lea masani, se ia o'o lava ina fa'afuase'i se va'aga fou ma le uiga'ese na o'o mai. O lenei va'aiga o le tuta mai lea o va'a fai la tetele a ni itu'aiga tagata e papa'e ma 'ese o latou uiga, na o'o mai ma a latou oloa ma le latou tapua'iga, fa'atu i atu motu, ma nonofo mau ai loa. O lenei mea fou, o le taunu'u mai lea o papalagi.

O le ulua'i feso'ota'iga lava fa'amaumau a Samoa ma papalagi o le 1722, ina ua va'aia ma taunu'u mai le ali'i folau Tenimaka o Iakopo Rokeuaine. Na soso'o mai ai ma le ali'i Farani o Atonie Poukenivili i le 1768, ma le isi ali'i Farani fo'i o La Peruse i le 1787.

O lo'o i le itu i matu o Tutuila i le nu'u o Aasu (lea ua tu'ufua nei) se ma'a fa'amanatu na fa'atuina e le Malo o Farani mo le to'a 12 o seila Farani mai le faigamalaga a La Peruse sa tagata valeina ai i se fe'ese'esea'iga na fa'apea na mafua ona o le fete'ena'i o uiga fa'apapalagi ma le fa'asamoa. Ua fa'aigoaina i le fa'apapalagi lea nofoaga o le Faga o le Toto Masa'a. O lenei ma'a fa'amanatu o lo'o ua i le Resitara o Nofoaga Taua Fa'asolopito. O le itu e fa'anoanoa ai, e leai se fa'amanatuga o i ai pe ua faia mo le to'a 39 o Samoa na maliliu ai fo'i i le fa'alavelave lea.

O le ulua'i misionare kerisiano na taunu'u mai o le ali'i Egelani o Ioane Viliamu mai le Lonetona Misionare Sosaiete (LMS) i le 1832. O lo'o fa'amanatuina lona ulua'i tu lau'ele'ele i Tutuila i se fa'akoluse sima i le talafatai o Leone. Sa matua iloga le suiga o le soifuaga masani ae maise le aganu'u a Samoa i le taunu'u mai o Ioane Viliamu ma lana au tala'i.

O fale e lua pito i leva o lo'o tutu pea e o'o mai i le aso i le teritori o le a'oga lea a tama i Fagalele (sa amata i le 1855) ma le a'oga a teine i Atauloma (amata 9 i le 1899), sa fauina e le LMS. O nei nofoaga uma ua i totonu o le Resitara o Nofoaga Taua Fa'asolopito a le Iunaite Setete. O nei fo'i nofoga ua i se tulaga talale ma le fa'aletonu ona o le le tausisia o le fa'aleleia e le Ekalesia Fa'apotopotoga Kerisiano i Amerika Samoa, lea e umia le pule i nei nofoaga mai le taimi na suia mai ai i le LMS. E i ai misionare mai isi atu motu o le Pasefika na o'o mai a latou tala'iga i Samoa i le taimi lea, mo o i latou mai Tahiti na fesoasoani i le LMS (lea na maua ai le isi igoa o le Lotu Ta'iti) ma misionare mai Toga na fesoasoani i le Metotisi (ma maua ai le igoa o le Lotu Toga).

I le fa'asolo mai i le 1850, sa fa'aopoopo malie pea le o'o mai o le au fai oloa mai Europa ma Amerika, ma fa'atutu a latou faleoloa i Tutuila. O motu o le Manu'a Tele sa leai lava ma se a'afia i nei suiga uma i le vaitaimi lea.

O fale na fausia i le vaitaimi o le taunu'u mai o papalagi Europa (fa'apea Amerika i le vaitaimi o le Fua) e iloa gofie lava ona o le fa'aaogaina o se ituaiga o sima ese. Sa le tele se suiga na i ai nu'u ma afioaga I tua, ma na fa'aauau pea le tulaga masania na i ai mo le tele o tausaga. O le taimi fo'i lea sa le toe amana'ia ma fa'aaogaina ai loa ma 'olo, vili ma'a, fa'apea ma tia seu lupe, ona o le olaga fou ma mea fou ua o'o mai.

* * *

Vaega 4: Taunu'u Mai o le Vaega a le Fua

Tusia: John Enright ma Stan Sorensen

Fa'aliliuina: Eti Sa'aga

O le ulua'i fa'anaunauga lava a Amerika i motu o Samoa, o le tulaga lea o le fa'apaleni ina o le pulega o le lalolagi ma isi malo tetele o Europa, a'o luluti le sa'iliga malo ma kolone i a malo tetele i le lalolagi atoa. I le 1880, o malo e lua o Europa na matua malolosi i le sa'iliga kolone - o Peletania ma Siamani - ma ua o'o le fa'amautuina o a la aia i Upolu.

I le vaitaimi lea, o atu motu o le vasa Pasefika e peiseai o le vanimonimo i malo tetele o Europa, ona o le lautele toe anoanoa'i motu e mafai ona avea ma kolone aua tulaga tau tamaoaiga ma fefa'atauaiga. O le taimi lea, sa matua taua tele le popo ona o le tupe e maua mai ai. O le ala i le pulega fa'avaomalo, e fa'avae lea i ala o fefa'afauta'iga i le sami, ma e uia ia taulaga malu puipuia ona o kolone ua fa'atutu solo i atunu'u ma atumotu 'ese'ese. Ona o lea la tulaga, ua fou ai le taua o Samoa, lea e i le fa'atausi'usi'uga o le lalolagi. Ua avea nei Samoa ma nofoaga taua tele i itu tau feoa'iga ma feuia'iga o le vasa.

O Mati i le 1889, na se meanu lava e fepa'ia'i ai va'a tau o fuava'a a Siamani, Enelagi ma Amerika i le taulaga o Apia. Ua sauni manuao a nei malo mo le taua po'o ai e pulea le atu Samoa, lea e matua leai lava se latou aia fa'alelalolagi po'o le fa'alelagi i ai.

Ae ai lava o le finagalo o le Atua na fa'afuase'ia ai se afa tele i le fa'atausi'usi'uga o le masina o Mati, ma na fa'aleagaina ai le tele o manuao sa tu'u taula i le taulaga, fa'apea ma ni isi fo'i sa taumafai e sosola 'ese aga'i i le vasa loloa. Na matua tele mea na fa'aleagaina e lenei afa. E le gata i lea, ae o le soifua ma le ola o le to'atele o ali'i saila, ma tagata Samoa na maliliu ai. E ui i lea, o le afa lenei sa taofia ai ma le taua tele se meanu e tupu mai.

I le 1899, sefulu tausaga mulimuli ane ai, na sainia ai e malo tetele o Siamani, Peretania ma le Iunaite Setete se maliliega - e aunoa ma se finagalo po'o se aia a tagata Samoa - i le vaeluaina o o latou motu. I lea maliliega, na tu'uina atu ai le vaega i sisifo o Samoa i le pule'aga a Siamani, ae o le a va'ai e le Iunaite Setete le vaega i sasa'e, lea e i ai motu o Tutuila, Manu'a ma Aunu'u.

O le tausaga fo'i lava lea na fausia ai se uafu ma fa'atu ina ai se nofoaga mo le la'uina o le koale a le Fua a le Iunaite Setete i Fagatogo. O le ta'ita'i 'au o Commander Benjamin Tilley o le Fua a le Iunaite Setete na avea ma ofisa muamua e pulea ma va'aia le nofoaga o le Fua a le Iunaite Setete i Tutuila.

O Tilley na gafa ma le fausia o le fale o le Fua numera tasi, le Fale o le Malo i le tolotolo o Togotogo i Utulei (lea ua avea nei ma nofoaga o le kovana). Talu ai le matagofie o le tulaga, sa avea ai loa lenei nofoaga ma fa'a'autu o ofisa uma e pulea le vaega o le Fua a Tutuila. E $15,000 na fa'aagaga e le Matagaluega a le Fua mo le fa'atauina o laupapa, sima ma 'apa aua le fauina o lenei nofoaga. O le Fale o le Malo na fa'auluina i le Resitara o Nofoaga Taua Fa'asolopito a le Iunaite Setete i le 1972, ma sa fa'apineina o se nofoaga iloga fa'asolopito i le 1990.

O nisi o fale na fa'atuina i le vaitaimi lea ua aofia ai le fale o le Fua numera 21, o le Fale o Pulega o Galuega (lea o lo'o i ai nei le Fa'amasinoga), le fale o le Fua numera 31, ma le fale nonofo o fitafita (lea o lo'o i ai nei le Ofisa o Leoleo). O nei fale e lua o lo'o i le Resitara o Fale Taua Fa'asolopito a le Iunaite Setete. Ua avanoa fo'i la ma tupe maua mai le Malo Tele mo le toe fauina ma le fa'aleleia o nei fale, ma e le o toe mamao na amatalia loa lea o galuega.

Sefulu ma le tolu tausaga mulimuli mai ai, a'o tu lata Amerika i le a'afia i le taua lona lua o le lalolagi, sa fa'aagaga ai le $23,491 e le Konekeresi mo le fa'aleleia atili o le nofoaga o le Fua i totonu o Tutuila. O nei vaega tupe na fa'aaogaina e fausia ai se fale uaealesi (fale o le Fua numera 38 lea e fa'aaoga nei e le Ofisa o Resitara) ma le Komiseri (fale o le Fua 43 lea o lo'o i ai nei le fale o Mata'aga). O nei la fale uma, ua i totonu o le Resitara a le Malo Tele, fa'atasi ai ma le fale nonofo o fitafita, le fale Fa'amasino ma isi fale o lo'o i Fagataogo ma Utulei, lea o lo'o aofia i tala fa'asolopito o le Fua i Tutuila.

* * *

Vaega 5: Tutuila ma le Taua Lona Lua o le Lalolagi

Tusia: John Enright ma Stan Sorensen

Fa'aliliuina: Eti Sa'aga

E la'ititi le a'afia o Ameirka Samoa i a'ave o Taua Lona Lua o le lalolagi, ona o le tu mamao 'ese mai i Europa. Ia Aukuso i le 1914, na ave fa'amalosi ai e vaega 'au a Niu Sila (lea na fai ma sui o Peretania ia Samoa i Sisifo) ia Upolu mai le pule'aga a Siamani e aunoa ma se fa'ataute'ega. O le taimi lava lea, na fa'amutaina ai fo'i le a'oa'oina o le gagana Siamani i a'oga i Samoa i Sisifo. Ae sa fa'aopo'opoina pea nai suiga i Tutuila i le vaitami o le Fua a le Iunaite Setete.

O le Taua Lona Lua o le Lalolagi na matua tele ai le suiga na o'o ia Samoa atoa, ae maise ai fo'i le tele atili o le aloa'ia o le tulaga o Samoa i le Pasefika.

I le amataga o le taua, o Amerika Samoa na fai ma nofoaga i le laina i luma. O le osofa'iga a le malo o Iapani i le taulaga o Pear Harbor i le Aso 7 o Setema, 1941, na o'o ai le Fua a Iapani i se tulaga e ono pulea ai le Pasefika i sisifo. Na le pine le va'aia so'o i lea taimi ma lea taimi i luga o Tutuila o va'alele sikauti a Iapani. O le Aso 11 o Ianuari 1942, na pau'u ai ni pulu na tafanaina mai e se va'atofu a Iapani, i le fagaloa i Pago Pago. O se tasi o nei pulu fana na lavea ai le fale o Frank Simasaki i Utulei.

O le nofoaga o le Fua i Tutuila i le Taua Lona Lua o le lalolagi na avea ma nofoaga tutotonu o le Vaega Au Puipui a Samoa lea e a'afia ai ma Tonga, Uea, Elise ma nisi o motu o le Atukuki, fa'apea ma Tahiti. O se vaega puipui pito i tele lea sa i ai i le Pasefika.

O toega pito i taua o lo'o i ai pea e o'o mai i lenei vaitaimi, o fana fanua tetele ia e lua e ta'i ono inisi i luga a'e o Faga'alu, ma le atu fana laiti i le gutu o le ava i le tolotolo i Lauli'i. Na fa'ata'atitia uma nei fana i le 1941. O le fana pito i lalo i Faga'alu o lo'o ua i totonu nei o le Resitara o Pine Fa'amau Fa'asolopito a le Malo Tele.

O isi toega o lo'o i ai pea mai le vaitaimi o le Taua e aofia ai 'olo sima o lo'o salalau solo I le motu. E silia i le 50 'olo sima laiti o lo'o si'omia ai Tutuila i lona gataifale, ma nisi e tetele atu i le fa'asolo aga'i i atu mauga. O le 'olo sima pito tele sa avea lea ma autu o feso'ota'iga a le Malini Koa, ma o lo'o i le Happy Valley i luga a'e o Pago Pago.

O Tutuila na avea ma se tasi o nofoaga fa'afalema'i pito tele i le Taua Lona Lua, ma sa fa'a'autu i Mapusaga e soso'o lava i le itu i sisifo ma le Kolisi Tu'ufa'atasi o Amerika Samoa. Sa fa'aigoaina lenei nofoaga o le MOB 3 ma o se falema'i muamua lea, ua fa'atuina mo le togafitia o fitafita manunu'a mai fetau'iga i Guadalcanal ma ni isi o motu o le atu Solomona. I le taimi lenei, pau toega o le MOB 3 o lo'o i ai, ua na o ni fa'avae sima ua salalau solo, ma se fa'atanoa vai i luga ane o le faletalimalo o le Apiaolefaga.

I talane o le falema'i i Malaeimi, sa i ai se nofoaga mo le koleni ina o malini i le 1942. Peita'i, na tapunia lenei nofoaga i le 1943, ona o le pepesi o le fa'ama'i o le mumu na a'afia ai fitafita. Talu ai ona o le vanu i Malae'imi o se nofoaga sa i ai se togalauapi tele a le vaega'au, o lo'o maua ai fo'i ma ni 'olo. O i fo'i sa i ai ma le isi fale uaeaalesi ma fale nofo fa'aleoleo. O fa'avae sima o lenei fale uaeaalesi ma le fale nonofo o lo'o i ai pea e o'o mai i le aso.

E lua ni malae va'alele sa fauina i le taimi o le taua. O le malae i Tafuna na mae'a i a Aperila 1942. O le malae lea na fa'alauteleina ina ua uma le taua, ma ua fai nei ma malae va'alele tu totonu i Amerika Samoa.

O le isi malae sa fai e sese'e ai va'alele tau laiti, i le mafola lea ua i ai nei le a'oga maualuga a Leone ma le a'oga a Mitikifi. Ina ua uma lea malae i le 1943, e na o le lua lava va'alele (F4F Wildcat) na sese'e ma toe o 'ese mai ai, ona le toe fa'aaogaina loa lea. O le mafua'aga e fa'apea e fai si mata'utia o le agi ane a matagi i le itu lea (ai se a na le iloa ai lea tulaga a 'o le'i fauina le malae e o'o mai i le aso e le mautinoa).

Fa'ato'a maua le saogalemu o Tutuila ina ua to'ilalo vaega'au a Iapani i le taua o le Coral Sea ma Midway. Ma a'o fa'asolosolo malie atu le taua i matu ma sisifo i le atu Malesala, Mariana ma Filipaina, na uma malie ai fo'i ma le tulaga i le laina i luma o Amerika Samoa. O le taimi fo'i lea na amata ai ona fa'aitiitia le vaega'au i totonu o le motu.

O toega va'aia o le taua o lo'o i ai pea i Amerika Samoa o se fa'amanatuga taua tele lea i le tulaga iloga na i ai Amerika Samoa i le Taua Lona Lua o le Lalolagi.

* * *

Vaega 6: Nofoaga 'Eli Ma'a i Tutuila

Tusia: John Enright ma David J. Herdrich

Fa'aliliuina: Eti Sa'aga

E talu ai nei pe a ma le 20 tausaga ua mavae fa'ato'a mafai ai e ali'i su'esu'e ma tusi talafa'asolopito ona tu'ufa'atasi se taua tele sa i ai Tutuila i le tele o seneturi a e le'i taunu'u ma tu lau'ele'ele mai papalagi. O lenei tulaga sa amata mai i atu mauga o lo'o ua ufitia nei e vaomatua, sau ai i le talafatai, ma o'o atu ai i isi motu o le Pasefika o lo'o salalau solo. O lenei tulaga taua tele o nofoaga 'eli ma'a o Tutuila.

O le faiga o u'amea ma 'apa e le o se masani na i ai i atu motu o le Pasefika. A e le'i taunu'u mai papalagi, o a lava mea fa'anatura na maua e tagata o le Pasefika sa latou fa'aaogaina e fai ma mea faigaluega fa'apea 'au'upega.

O sa'ili'iligaa fa'asaienesi ua fa'amaonia ai le tele o mea sa fausia i atigi figota fa'apea fo'i ma ma'a, e fa'atatau tonu lava i o latou fa'aaogaina ta'itasi. O se tasi o nei mea o le to'i ma'a lea, ma sa fauina i se ma'a maugamu malo pa'auli. E tele fo'i fa'amatau, tofi ma isi mea faigaluega sa faia i le itu'aiga ma'a malo lea.

O le tele la o le ituaiga pito i lelei o le ma'a lenei e maua solo i atu mauga Tutuila. Sa silafia lelei e tua'a lenei mea, ma sa latou fausia ai ni mea faigaluega ma au upega pito i anagata mai nei ma'a. I le taimi lenei, e sefulu nofoaga sa tu'i ai nei ma'a i aso anamua ua mauaina nei. O le fa pito i tetele lava o lo'o i tua o Leone, Faga'itua ma Tula, ma le tasi o lo'o i le pito mauga 'oso'oso i Fagasa.

I so'o se tasi lava ua masani i su'esu'ega fa'apenei, e tasi lava le va'ai i nei nofoaga ona iloaina le tele ma le tigaina o galuega sa faia ai, ae maise ai le miliona o itula faigaluega sa alu i le fausia o 'au'upega ma mea faigaluega mai nei nofoaga. O le tele o su'esu'ega na faia i nei nofoaga, o le mafola mai fo'i lea o se tulaga sa lilo, lea na soifua ai i lea aso ma lea aso i le selau ma selau o tausaga ua mavae o tatou tua'a, ma ua latou le toe mafai ona fa'amatala ma fa'ailoa mai.

Mai le tele o fasi ma'a, to'i ma'a, 'au'upega, mea faigaluega, ma isi mea na maua solo ma fa'aputuputu mai, fa'atasi ai fo'i ma le mauaina o galuega tau ma'a, fa'avae tuai, olo ma pa na toe 'eliina a'e, ae maise ai lava i le laufanua o Tagatamatua i Leone, ua mafai ai ona tu'ufa'atasi ma fausia se ata va'aia o le maopoopo ma le mautu lelei o le gaosia o nei mea, fa'apea ma le tulaga tau maoopoopo o le pulega ma le tamaoaiga i lea vaitaimi. E leai leai lava se isi nofoaga o 'eliga ma'a fa'apea o i ai i totonu o Samoa atoa. O mea faigaluega sa gaosia i lenei nofoaga e fa'apitoa lava mo le fa'atauina atu i isi motu o le Pasefika.

E mamao mai i lalo Tagatamatua pe a e tagai i ai mai i luga o le togavao i Leone. E faigata tele fo'i le ala aga'i i ai. A e o le nofoaga lea o le 'eliga ma'a pito i tele, e 50 eka sa fa'atumulia atoa, ae ua ufitia uma nei e le vao. Talu ai la ona o le taua tele o lenei nofoaga i aso anamua, o lea ua fa'aulu ai fo'i Tagatamatua i le Resitara o Nofoaga Taua Fa'asolopito a le Malo Tele.

E tatou te iloaina se tulaga tau pulega sa i ai i lea vaitaimi, pe a tatou taga'i i le auala na fausia ai nei meafaigaluega i lea nofoaga. E tusa ai ma sa'ili'iliga ua alia'i mai, sa faia fa'asolosolo pe fai sitepu ma vaega le fauina o nei mea faigaluega. E le'i ta tasia se mea faigaluega e tasi, ae sa tofu lava le pito o le eligama'a ma le gaoioiga e fai fa'asolo i le mea faigaluega e tino mai ai. Ae 'ai se a na ala ai ona fausia olo puipui tetele e li'o ai le nofoaga o le 'eliga? 'Ai se a na ala ai ona malosi le puipuiga o lenei nofoaga?

I lalo i Sogi i Leone, e selau ma selau foaga o lo'o i ai i le ma'a lava lea a alu aga'i i le sami. O le talitonuga, o 'i le vaega mulimuli lava sa fa'a'uma mai i ai le faiga o to'i ma'a ma isi mea faigaluega ma 'auupega. O foaga nei sa olo fa'amolemole ai mea ia sa faia fa'asolosolo mai i luga o le mauga. Ae ai se a ua so'o na tele ai fa'apea nei foaga? Fa'amata e to'a fia na nonofo i lea aso ma lea aso i le sua o le tai e tau fai olo fa'amolemole to'i ma'a ma isi mea faigaluega ma auupega, a'o le'i auina atu i isi motu o le Pasefika? Fa'amata e fia ni va'a sa afea ma tuta i gatai o Leone a'o fa'atalitali e 'ave a latou uta o auupea ma mea faigaluega?

E tele to'i ma'a ma isi mea mai Tutuila na alu 'ese atu i fefa'ataua'iga ma fafo. Talu ai ona ua mafai ona su'esu'e au'ili'ili ituaiga ma'a ma o latou tupu'aga, o lea ua fa'amaonia ai o le tele o to'i ma'a ma isi mea faigaluega na maua talu ai nei i Fiti, Toga, Atu Kuki, Manu'a ma Samoa i Sisifo, e sau mai uma i le ituaiga ma'a o lo'o maua i Tutuila. O lea fa'ato'a amata sa'iliga i le tulaga o le feso'ota'iga i aso anamua, ae ua tulaga taua nei Tutuila ona ua mautinoa sa ogatotonu mai i ai feso'ota'iga tau fefa'ataua'iga o mea faigaluega ma 'au'upega.

O le mea e pito i sili ona manaia i le nei tulaga, o lea lava e fa'aauau ma e tele lava isi mea fou e tatou te maua ma iloa ao fa'agasolo pea su'esu'ega.

* * *

Vaega 7: Tia Seu Lupe

Tusia: John Enright ma David J. Herdrich

Fa'aliliuina: Eti Sa'aga

O se tasi o itu matagofie i o tatou tua'a, o le latou soifuaga lea tau ta'aloga ma tauvaga. O le tele o o tatou mafaufauga i tala fa'asolopito e mamafa lava i le itu o taua ma fevaevaea'iga, ae e la'ititi lava le taimi e tatou te manatunatu ai i ta'aloga ma fa'afiafiaga na feagai ai ma nei tua'a.

Ua fa'amaonia ona o tala tu'u fofoga a Samoa, fa'amaumauga a misionare ma ulua'i papalagi na taunu'u mai, fa'apea fo'i ma nofoaga ua toe mauaina nei, le i ai o le ta'aloga fa'atamatane a tamali'i Samoa o le seuga lupe.

O lo'o i totonu o le loloto o le vaomatua o lo'o solosolo solo i atu mauga faupu'ega ma'a po'o tia, sa fai ai lenei ta'aloga. O le anoanoa'i o nei tia ua maua (ae atonu o lo'o tele fo'i ni isi o i ai pea) fa'apea ma le faigata o le latou fausia, ua iloa ai o le seugalupe o se tasi o fa'aga tama pito i taua tele i le soifua ma le aga i fanua a Samoa anamua.

E 'ese'ese lava foliga ma le tetele o tia, ae pei sea'i e foliga tutusa uma ona o le tele lava e fau i ma'a, lau lapa ma palapala, ma e i ai le mafola lautele i le ogatotonu luga. O tia tetele e o'o atu lava i le 30 - 40 mita le lautetele, ma e maua lava le 5 mita le maualuluga. E ta'ua i le fa'apapalagi tia o "star mounds" po'o faupu'ega fa'afetu, ona e fai 'ave e pei se fetu. E salasala lava, ma o le tele o ave e 5 i le 8 i le tia e tasi.

E silia i le 80 tia seu lupe ua maua i totonu o Tutuila lava ia. O le lupe o se tasi lea o matai'ai a tamali'i Samoa sa i ai ona e le gata o le lololo ma le malu, ae toe tofo lelei fo'i o lona 'a'ano. O le isi fo'i itu o le faigata ona maua, ma e seasea maua i aso uma. I aso ua mavae, pei sa fa'apito lava lupe e maua mo matai, ma sa fa'aaogaina fo'i mo fa'aaloaloga fetufaa'i o mea taumafa. Sa anoanoa'i le lupe sa i ai i aso ua mavae, ona e pei sea'i e pau lava le 'auala e mafai ai ona maua o le seuina lea. Ae ina ua o'o mai papalagi ma a latou la'au malolosi ma fana, ua matua iloga lava ona fa'aitiitia le faitau aofa'i, ma tauau ai lava ina uma. O le itu tonu lava lea ua fa'asaina ai ona toe fanaina, tusa lava pe o'o i le tai lupe.

O fa'amaumauga a papalagi na ulua'i taunu'u mai o lo'o ripotia ai se ta'aloga e pu'eina ai lupe i le seuina lea i se pou umi mai luga o se maupu'epu'e maualuga. E le gata i lea, ae o le tele fo'i o muagagana a Samoa o lo'o ta'ua ai le seugalupe o se ta'aloga a tamali'i.

Ae atonu e i ai fo'i le isi itu i lea lava ta'aloga e le o mautinoa i le taimi lenei.

E tusa ai ma fa'amaumauga a le ali'i konesula o Peretania i Samoa o William B. Churchward i le 1887: "O le seuga lupe o se ta'aloga pito i leva ma matua fiafia tele i ai Samoa atoa, ma e foliga mai ua sili atu lona faiga fa'asauniga i le taimi nei na i lo'o le fiafia fa'ata'aloga i ai. Ua fai ma taimi o faiga'ai ma fa'afiafiaga silisili, ma i le taualumaga o nei tulaga, ua faia ai ma ni amio e le tusa ai o le a le ta'ua."

Masalo ai o "amio e le tusa ai o le a le ta'ua" ia na ala ai ona le fiafia ulua'i misionare na taunu'u mai i le ta'aloga o le seuga lupe, ma o lea na latou taumafai vave ai loa e taofia.

O se tasi o tia seu lupe pito i atoatoa o lo'o ua tu totonu nei i ai le Paka o Tia Seu Lupe i Amerika Samoa, ma o lo'o feagai tonu ane lava ma le laumua o le Ekalesia Katoliko i Fatuoaiga i Tafuna. E 'ese mai lava le tia lenei ona e le gata ina i ai lona fata maualuga ma ona ave o lo'o alu aga'i i fafo fa'ata'amilo, o lo'o i ai fo'i ma isi maupu'epu'e e lua i luga e 'ese'ese fo'i maualuluga. O le umi tu'ufa'atasi o nei vaega uma e lua e 34 mita, ma e 3 mita e maualuga ai nai lo le mafola gaoa o le laufanua i lalo.

E momoli le fa'amalo ma le fa'afetai tele i le aiga o Haleck ona o le latou fa'asaoina o lenei tia i luga o le latou lau eleele, na tu'u e sua ese mo fuafuaga tau pisinisi. Talu ai o lea, ua maua ai le avanoa e le lautele o le atunu'u, ma fai fo'i ma ala e mafai ai ona tatou toe tepa i aso anamua i mea sa fa'afiafia ma feagai ai ma o tatou tua'a. Ua fa'alaugatasi le ala savali mo e maimoa, ae maise fo'i se tulaga ua fausia e fa'afaigofie ai i e asiasi ona maimoaina lenei va'aiga uiga ese. O le vao matua o lo'o i ai pea e mai lava anamua, ma e mafai ona maua tonu ai i 'i se fa'alogona sa i ai lenei nofoaga i le selau ma selau o tausaga talu ai, a'o uluola lupe i le togavao, ma o faia fo'i le ta'aloga o le seuga.

Ae paga lea, e tele ni isi tia seu lupe ua fa'aleagaina ma suaina. E le gata i lea, o lo'o i ai fo'i ni isi tia o le a afaina ona o le fa'amamaina e aiga o o latou laufanua. O le naunauta'iga o le Ofisa Puipui o Measina Fa'asolopito, o le fa'asaoina ma su'esu'eina lea o nei tia uma, ma e talosaga atu ai i le mamalu lautele i le latou fesoasoani i le fa'asaoina o nei nofoaga sa fai ai faiva fa'atamatane a tupu ma tamali'i o Samoa anamua.

* * *

Vaega 8: O le Resitara o Measina Fa'asolopito a le Malo Tele

Tusia: John Enright

Fa'aliliuina: Eti Sa'aga

E i ai taimi e fa'asino ai tusitusiga nei ma fa'apea o lenei nofoaga po'o lenei fale ua i ai nei i le lisi o le "Resitara o Measina Fa'asolopito a le Malo Tele" po'o le "Resitara o Nofoaga Taua a le Malo Tele." O le a tonu lava le uiga o nei tulaga? Ae o le a fo'i le taua o nei "resitara?"

E i ai nofoaga, fale ma isi mea e taua tele i le itu fa'asolopito o le Malo Tele, ma o resitara nei ua fa'apitoa lava e aloa'ia ai nei mea uma. O le i ai o Tutuila ma Manu'a i totonu o nei resitara ua avea ai ma vaega atoa o le Iunaite Setete i lona tala fa'asolopito, ma ua agava'a ai fo'i i le puipuiga fa'aletulafono fa'apea fesoasoani tau tupe.

O lo'o lisiina i le Resitara o Nofoaga Taua a le Malo Tele nofoaga ua aloa'ia ona o le latou taua i le itu fa'asolopito, ma o nei nofoaga e tatau ona puipuia ma fa'asaoina. O le Resitara a le Malo lenei sa fa'avaeina i lalo o le Tulafono Fa'asao o Mea Fa'asolopito 1966, ma o se polokalama a le malo e galulue fa'atasi ma le lautele o tagata i le latou lagolago, fa'apea ma fesoasoani ta'ito'atasi e fa'ailoga ai, toe fa'alelei ma puipuia ai nofoaga ma mea taua uma i le fa'asolopito.

O le Resitara a le Malo o lo'o fa'atautaiina e le Matagaluega o Paka a le Malo Tele i lalo o le va'aiga a le Failautusi o le Initeria. O mea uma o lo'o aofia i le Resitara a le Malo o lo'o i ai itumalo, nofoaga, fale, ma mea uma ua aloa'ia e taua i le fa'asolopito, aganu'u ma taimi ua mavae i le fa'asolo mai o le Iunaite Setete. O nei mea uma ma le latou tu'ufa'atasiga, e taua tele i le fausia o le tala'aga atoa o le fa'avaeina mai o le malo atoa.

O mea totino uma lava ua i totonu o le Resitara a le Malo, o mea ia ua fa'ailogaina ma aloa'ia ina ua mae'a ona fa'amaonia i se 'auala e tusa ai ma ni tulafono pasia puipui mau. O nei tulafono pasia a le Failautusi o le Initeria e fa'aaoga uma e setete ma teritori ta'itasi i le filifilia o a latou measina ma nofoaga taua e tatau ona i totonu o le resitara aua le puipuia ma le fa'asaoina, fa'apea fo'i ma le aloa'ia e le Malo Tele.

I le taimi lenei, ua silia i le 20 nofoaga i Amerika Samoa ua i totonu nei o le Resitara a le Malo Tele, ma o le Ofisa mo le Fa'asaoina o Measina Fa'asolopito a Amerika Samoa na gafa ma le tu'uina o nei nofoaga i totonu i le 25 tausaga uma mavae. O le 14 o nei nofoaga o fale ia o le malo mai le vaitaimi o le Fua, ma o lo'o i ai pea i Fagatogo ma Utulei. E fa ni isi nofoaga o le a fa'aopoopo i le Resitara, ma o lo'o tapeanaina fo'i galuega tau pepa e fa'aulu ai le isi lima.

O le Maota o le Malo (i le Mauga o Ali'i) ma fana i Faga'alu ua aloa'ia ma fa'auluina e le Failautusi o le Initeria ona o le tulaga taua o nei nofoaga i le talafa'asolopito o Amerika.

O le a le taua o se nofoaga pe a fa'apea o lea a aloa'ia i totonu o le Resitara a le Iunaite Setete?

E taua tele ona o lona uiga, o le a aofia lenei nofoaga i fuafuaga uma a le Malo Tele, ma o le a agava'a fo'i i se fesoasoani tau tupe e fa'aleleia atili ai lea nofoaga. E ui lava i lea, o le a le aia pe fa'alavelave lea i le pule a le e onaina le fanua i so'o se suiga ma se faiga e na te faia e tusa ai ma lana aia i lona fanua.

I Amerika, a fa'apea e fa'aalu e se tasi e onaina le fanua o lo'o i ai i luga se nofoaga taua se tupe e fa'aleleia ma puipuia ai lea nofoaga, o le a maua le fa'agafua o nei tupe mai le lafoga a le Malo Tele. E leai se tulafono fa'apea o i ai i Amerika Samoa i le taimi lenei.

Atonu e tatau ona i ai. Atonu e tatau ona tele se isi puipuiga i le lotoifale e faia mo le fa'asaoina o measina fa'asolopito fa'apitoa o i totonu o o tatou motu. Ai se a o le a tatou tu'uina ai i le Malo Tele le matafaioi o le fa'aauauina o le tatou aganu'u ma le soifuaga fa'aagaifanua?

E tuputupu pea tala ma mea fa'asolopito i le fa'asolo mai o tausaga. Ma e tofu lava le auga tupulaga ma le latou tala mai le loloto o tausaga ua mavae e fa'asolo ifo i tupulaga fai a'e. O le fesili tele mo tatou, o le a le tatou tala e fa'asolo atu i fanau a a tatou fanau pe a o'o mai tausaga ua matutua ai I latou e pei o i tatou i le taimi lenei?

* * *

Nofoaga i Amerika Samoa o lo'o i totonu o le Resitara a le Malo Tele:

O le Nofoaga a le Fua a le Malo Tele i le Itumalo Fa'asolopito o Tutuila o lo'o aofia ai fale i Fagatogo ma Utulei e pei ona ta'ua i lalo (ma o latou fa'aaogaina i le taimi nei):

Fale o le Fua 1. Fale o le Malo (Nofoaga Iloga Fa'asolopito)

Fale o le Fua 20. Fale Nonofo Ofisa ( Fale Fa'amasinoga Itumalo)

Fale o le Fua 21. Ofisa o Pulega (Fale Fa'amasinoga Maualuga)

Fale o le Fua 26. Fale Nonofo Ofisa (Maota Sui Kovana)

Fale o le Fua 31. Fale Nonofo Fitafita (Ofisa o Leoleo)

Fale o le Fua 38. Fale Uaealesi (Ofisa Resitara)

Fale o le Fua 43 & 24 Komiseri (Fale Mata'aga)

Fale o le Fua 45 Fale Falaoa (Western Union)

Fale o le Fua 67 (Ofisa o le Tiute)

Fale o le Fua 72 Fale Puipui (Fale Teu Tusi a le Malo)

Fale o le Fua 78 Fale Teu Pulufana (Tua o le Fale o Leoleo)

Fale o le Fua 131C. Fale Tali Malo tuai Rainmaker (Ofisa

Mini Games)

Fale o le Fua 133 Fale nonofo teine tausima'I (Kalapu Va'afaila)

Fale o le Fua 140 Kalapu a fitafita (Fale mautotogi tuai I tua o le

Ofisa o Leoleo)

Malae mo Savali ma Foleni (Malae o le Talu)

O isi nofoaga:

Nofoaga o Fanafanua, Gataivai, (Nofoaga Iloga Fa'asolopito)

A'oga a Tama I Fagalele, Sogi

A'oga a Teine I Atauloma, Afao

Fagaloa o le toto Masa'a, A'asu

Nofoaga 'eli ma'a, Tagatamatua, Leone

Nu'u I aso anamua, `A`a, fagaloa i Pa

O isi nofoaga ua fa`atutuina ina ia aofia i totonu o le Resitara:

Nofoaga i aso anamua i le faga i Fagatele

'Olo puipui AS 31-72, Faleniu

Nu'u anamua i Tulauta, Tula

Nu'u anamua i Malota, Malota

* * *

Vaega 9: O se Taga'i Latalata i a Tutuila i le Taimi o le Taua Tele, Amataga

Tusia: John Enright

Fa'aliliuina: Eti Sa'aga

Saua i le fa'alogo i le Kolisi Tu'ufa'atasi i Mapusaga: "Ou te le iloa pe o le a le mea ua ou 'avea ai fua le mataupu o tala fa'asolopito ae o mea na ua uma ona tutupu."

Ua silia nei i le 50 tausaga o sagai Samoa ma le sologa lelei o itu tau fa'asolopito, e le gata i le leai o se vevesi, ae o le aga'i fo'i i luma o le soifuaga. E moni na i ai afa ma matagi malolosi na pesia ai le atunu'u, ae maise ai faloga tau faiga malo. E ui lava la i nei itu, ae sa tumau pea le soifua filemu ma le faigofie o Samoa atoa i nei tausaga e tele.

O taua ma femisa`iga i le papa o fana, pomu, ma isi tulaga fa'aonapo nei, ua na o se leo e lagona e Samoa e ala mai i le CNN ma tala mai nu'u mamao. "O mea nei sa tutupu, ma ua uma ona tutupu," i tagata o isi atunu'u.

Ae le fa'apea e le'i o'o i ai Samoa i tulaga fa'apenei i taimi ua mavae. O lo'o manatua pea e ni isi matutua le taimi na pogisa atoa ma fa'asaina ai le tutuina o se afi po`o se moli i le po i Tutuila ma Manu`a atoa, ona o le puipuiga ae maise fo`i le mata`u i va'alele ma fuava'a a le fili, ae maise le fa'apopolega i tulaga o le a o'o i ai fanau laiti i se osofa'iga sa fuafuaina i le laumua o Tokio i Iapani. O fa'alogona nei ae maise le popole na o'o i o tatou tuaa, o tagata soifua fo'i e pei lava o i tatou sa soifua i lau fanua o lo'o tatou ola ai nei, fa'agotaina le sami o lo'o tatou lumafale i ai, ma savalia auala o lo'o tatou feuia'i ai.

O se tusitusiga fa'alilolilo lenei sa faia e le vaega a le Fua a le Iunite Setete ma fa'atoa fa'atagaina lona fa'alaua'itele i le 1972:

"O le osofa'iga a le Malo o Iapani i le taulaga o Pearl Harbor na matua fa'ate'ia ai tagata o Amerika Samoa, ma o lea na matua fa'anatinati ai loa le polokalama tau puipuiga ina ia saunia ia le motu i se tulaga e gafatia ai se isi osofa'iga e toe ono tupu mai. O Tutuila o se tasi o nofoaga sa fa'a'a'upegaina i le Pasefika i Saute ma e ono avea ma ogatotonu o gaioiga uma e pupuia ai feso'ota'iga ma Ausetalia, Niu Sila, Niukaletonia, ma fa'asolo atu ai i Niu Eperiti ma Kuatalakanala.

"O nisi o vaega a le Fua fa'apea tagata faigaluega fa'akonekarate i le motu sa aveina ma o latou aiga i nofoaga sa malutia. Ina ua logo tala tagata Samoa o le Iunaite Setete lea ua a'afia i le taua, sa lolofi mai loa mai itu uma o le motu, e tofu mai ma le sapelu e ofoina mai le latou lagolago e faia so'o se mea e puipuia ai Tutuila.

"Sa leai se taimi e toe popole ai i tupe fa'aalu po'o le fa'atagaina o mea o le a fauina. O le utiuti o le taimi ma le nanati o tapenaga e fa'asaga i le Malo o Iapani na tumua i mea uma. O le fa'atauaina o galuega ma mea faufale na fesuia'i fa'afia ina ia o gatasi ma le fa'amoemoe autu o le fa'atuina lea o se puipuiga i so'o se malosi e mafai ai aua se osofaiga. O fanafanua e ta'i ono inisi ua leva ona ta'atitia i luga o le uafu sa saunia ma fa'apipi'iina loa lava.

"O tagata Samoa malolosi uma sa vala'auina le latou fesoasoani i le fauina o le puipuiga; o fafine ma tamaiti, sa una'ia e galuea'ina le lau fanua ma fa'atoaga ina ia 'aua nei motusi mea taumafa. I le taimi fo'i lea, sa fa'atagaina ai le ta'ita'i 'au e le Matagaluega o Lotoa ma Uafu a le Malo Tele ina ia fa'aaogaina so'o se tagata sivili, ma so'o se mea faigaluega i so'o se fa'amoemoega o le puipuiga na te finagalo i ai."

O le Aso 20 o Ianuari 1942, na tu lau 'ele'ele ai i Tutuila le Vaega 'Au Lona Lua a Malini pe a ma le 5,600 le aofa'i o Ofisa ma Fitafita. O le masina fo'i lava lea, sa fa'amainaina ai alava'a uma o le sami e aga'i mai i le fagaloa i Pago Pago.

O lo'o fia maua e le Ofisa Fa'asao o Measina Fa'asolopito o Amerika Samoa ni tala sa tutupu i Tutuila ma Manu'a i le vaitaimi o le taua tele. Vala'au mai i le 633-2384 po'o le o'o mai fo'i tatou feiloa'i i le Ofisa i Faga'alu. O lou soifua o se tala pito i matagofie lea mo ou alo ma a tatou fanau. 'Aua ne'i se'etia i tatou i le manatu fa'apea o mea na ua uma ona tutupu.

* * *

Vaega 10: O se Va'iga Latalata i a Tutuila i le Taua Tele, A'afiaga

Tusia: John Enright

Fa'aliliuina: Eti Sa'aga

E le mafai ona tonu ma malamalama le fa'asolopito pe a aunoa ma le sa'o ma le manino o aso ma fuainumera. O le to'atele o tatou ua avea le manatuaina o mea moni ma aso ma avega e fa'aleamana'ia ai le a'oa'oina o le fa'asolopito. Ae ia i latou e fa'amaumauina tulaga fa'apenei, o mea moni ma aso o se itu e pito i matagofie ma taua tele ia. I le tele o taimi, o le fa'asologa o mea sa tutupu ma fa'amaumauga o fuainumera ma aso, ua avea lea ma tulaga e pei ua toe soifua mai ai o tatou tuaa ua maliliu.

E ui la ina le i o'o Tutuila ma Manu'a i le fa'atama'iga na i ai le tele o isi motu tua'oi o le Pasefika i le taua tele, ae o le a'afiaga ona o le tulaga na i ai ua avea ma suiga uiga 'ese e o'o mai i le aso o lo'o i ai pea.

Ae le 'i o'o i le taua lona lua, o le i ai o Amerika I Tutuila sa gata lava i le nofoaga o le Fua i Fagatogo ma Utulei. E ui ina ua 40 tausaga talu ona aloa'ia le pule'aga a le Kovana o le Fua a le Iunaite Setete i Tutuila ma Manu'a, o le mea moni, sa tumau pea le fa'aSamoa ma ana pule'aga, e 'ese mai i le faigamalo a le Fua.

I le 1940, a ua amata ona fa'apotopoto le ao uliuli o le taua tele, e na o le 10,311 tagata na nonofo i Tutuila, 2,597 e na nonofo i Manu'a, ae to'a 147 i Swains. I nei faitau aofa'iga, e to'a 31 papalagi, to'a 4 Iapani, tasi le Saina. O isi tagata na fa'aopoopo i ai, o le aufaigaluega lea a le vaega a le Fua e 263.

E o'o atu ia Me i le 1942, ua 7,995 le vaega a le Fua ma le Maligi i Tutuila lava ia, ma le isi 5,074 i Upolu ma Savai'i. Ua foliga mai, ua suia atoa le faitau aofa'i i le po e tasi. O le to'afimalie ma le sofiuaga filemu na matua malepe lava i le papa o fanafanua i taimi e fai ai fa'ata'ita'iga, ma o le lau fanua fo'i ua matua suatia e masini malolosi, fa'apea ma le ea ua fa'atumulia i le felelei solo a va'alele tau. E faitau afe ma afe le aofa'i o fitafita na fa'asolo mai i Tutuila ma Manu'a.

Ua pulea nei ia motu e le Malo fa'afitafita; o tane Samoa uma e mafai ona galulue ua tu'uina i le fausia o nofoaga a militeri fa'apea ma puipuiga. (Ia Iuni 1943, e 141 fale a le Vaega Au fa'apea ma nofoaga na fausia i Tutuila.) O tagata o Tutuila ua nonofo nei i se togalauapi ua fa'a'aupegaina. E to'atolu "fili mai fafo" sa saisai ma fa'afalepuipuiina (3 Iapani, 1 Siamani) ma sa toe tatalaina ma nofo va'ava'aia.

Ua fa'alogoina nei e Tutuila atoa le a'afiaga o le Vaega Au, ae maise ai o 'olo sima la'iti e 52 o lo'o salalau solo i le gataifale sa tiute pea e maligi I aso uma, lea sa tolauapi i nu'u ma afio'aga, ae maise o togalauapi na salalau i le motu aota. (O se tusiga igoa na faia i Samoa i Sisifo i le 1954, na atagia mai ai pe a ma le 1,600 tamaiti na ta'ua o 'afa maligi po'o fanau a maligi Amerika. E leai se faitauga sa faia sa faia i Tutuila.)

O le a'afiaga fa'asolopito pito i malosi ma le mamao o le itu lea tau i le tamaoaiga fa'apea le soifuaga lautele. O tane uma sa galulue i le fausia o tulaga tau i le puipuiga, ma ua leai se isi na toe galue i fa'atoaga. O le galueaiga o le lau fanua ma le fagotaina o le sami, ua amata ona suia e le tala Meleke. O le soifuaga fou fa'apisinisi ua ulufale mai i le nofoaga o le soifua fa'asoa a Samoa. O le tulaga fou, o le tamaoaiga lea fa'aamerika ua avea nei ma totino o le fa'asamoa.

I le 1941, o le tupe maua a le Malo o Amerika Samoa mai alaga tupe uma, e $87,330.00; i le fa tausaga talu ona uma le taua, e ova i le $1 miliona tupe na maua. O le taua tele na o'o mai ai le suiga fa'apapalagi i Samoa ae le o ni fa'atama'iga. O le taimi fo'i lea, na amata ai le tauiviga mo le fa'atumauina ma le puipuia o tu ma agaifanua, ae maise measina a le atunu'u.

* * *

Vaega 11: Maota o le Malo, Mauga o Ali'i

Tusia: John Enright

Fa'aliliuina: Eti Sa'aga

So'o se maota lava e i ai lona tala'aga. O maota lautele e i ai ona tala'aga lautele. E pei o le tafavalu o le nofoaga tutotonu o le Vaega Au (Pentagon), po'o se malumalu. I nei tulaga o maota nei, o le tala'aga e tasi o lo'o atagia mai ma o le mitamita fo'i lea, i tua o le fa'amoemoe na fausia ai. "O a'u o le malosi atoa" o lo'o aliali mai i foliga va'aia o le Pentagon. "Ou te vivi'i i le Atua" o lo'o susulu mai i foliga va'aia o le tele o malumalu.

O maota ma fale, e fa'amatala maia tufuga na latou fausia, ma o nei tufuga o lo'o latou fa'amatalaina mai se tulaga na i ai manatu ma mafaufauga i le taimi sa fausia ai. O fale ma nofoaga fa'asolopito ua latou tu'uina mai ni fesili e fa'apea: "O le a le mitamitaga sa i le tufuga na fausia lenei fale? "O le a le mea ua fa'amatalaina mai e nei mitamitaga ia i tatou e tusa ma mafaufauga ma manatu o le tufuga i lea vaitaimi?"

O le Maota o le Malo, sa fausia i le faliu o le Senituri i se fausaga ua ta'ua po'o ua lauiloa o le fa'avitoria i le teropika ma le fa'aeleni. Sa fausia lenei maota e le Fua a le Iunaite Setete i le 1903, i se tupe e na o le $15,000. O le tele o le galuega na faia e tagata Samoa i lalo o le va'ava'aiga a ali'i tusi 'ata a le Fua ma kamuta tomai e to'a lua mai Amerika. Na fausia le maota e alaala ai le ta'ita'i 'au o le Fua i Tutuila. O se mitamitaga tele lenei maota.

E o'o lava i tulaga sa i ai i Amerika i le faliu o le Senituri, o se matua fale lava lenei maota mo se ta'ita'i 'au a le fuava'a. (E 10,400 sikuea futu le aofa'iga o le fola atoa). O le sa fuafuaina, o le ali'i ofisa fa'aulu o Commander Benjamin Tilley na tusi i ona ta'ita'i i le 1902 ma lana talosaga, a fa'apea a tofia o ia e fai ma Kovana o Ameirka Samoa, e tatau ona maua e ia se nofoaga talafeagai ai, ua aofia ai ni tavini, tagata faifeau, ma tulaga uma fa'apena e o gatasi ma le tofiga. O se tulaga o le mitamitaga.

O le tolotolo o Togotogo i Utulei, lea na fa'aigoaina e le vaega a le Fua o le Observative Point sa suaina loa mai le maualuga e 80 futu i lalo o le 60 futu ma fa'amamaina mo le fausia o le fale. Ina ua ma'ea, na ti'eti'e maualuga le fale i le fagaloa atoa. O lenei fale pa'epa'e i lona tulaga tele ma le saviligia, na fa'amalumalu uma i fale sa i lalo ifo o le fagaloa.

Ae paga lea, o le ta'ita'i au o Tilley, ma lana talosaga e le'i taunu'u. O le ali'i na suia o ia o le ta'ita'i au o E.B. Underwood sa avea ma se na ulua'i nofoia le maota. I le isi 94 tausaga na soso'o ai, e to'a 31 kovana a le Fua Va'a, 7 kovana sivili na tofia, ma kovana palotaina e to'a 3, sa fa'aaigaina le maota. O se tasi o nei kovana, o le ali'i ta'ita'i au o W.J Terhune o le Fua Va'a, sa maliu ai ona sa pule i lona soifua.

Na fa'auluina le maota o le Malo i le Resitara Fa'asolopito o Maota Taua o le Malo Tele i le 1972, ma sa avea ma nofoaga fa'asolopito a le Malo Tele i le 1991. Ona o le tele o tausaga talu ona fausia ua mana'omia ai le fa'afouina pea o le maota. O mafui'e ae maise ai o afa malolosi, na fetaia'i ma le maota talu ona fausia. O se fausaga atamai tele sa faia ai lenei maota, ona o le viliina lea o u'amea o le fa'avae i lalo o le palapala i ni u'amea tetele ma le u'umi. Talu ai nei lava, na feagai ai le maota ma se toe fa'afouga o fafo ma totonu atoa. E ui ina e o'o mai nei o le tele o fale o lo'o punitia e la'au ma lilo ai le va'aiga atoa, e foliga mai i ata i tausaga ua mavae o le fale atoa na ta'alaelae lona tula'i mai. Aua a tonu o le tala'aga lea sa lagona ma fa'alogoina e i latou sa fausia lenei maota, ua avea nei ma afio'aga o le Kovana. E pei o se tusi i le fa'atonu talu ai nei i le nusipepa "e i ai fo'i le Fale Pa'epa'e o Amerika Samoa."

O le tala fa'anoanoa i le Ta'ita'i 'Au o Terhune

Tusia: Stan Sorensen

Fa'aliliuina: Eti Sa'aga

O le ali'i Ta'ita'i 'Au o Warren Jay Terhune mai le Setete o New Jersey sa tofia e avea ma kovana lona 13 o le Fua i Amerika Samoa ia Mati 18 1919, ma na ia nofoia le nofoa i le Aso 19 o Iuni o le tausaga lava lea. Sa le pine le tele o fa'afitauli na feagai vave ma ia, e a'afia ai lafoga, fa'asaina o 'ava malolosi ae maise le fa'atapula'aina o fa'aipoipoga i le va o papalagi ma Samoa. O nei mea, sa fa'amamafaina ona o le finau malosi mai a le Mau lea ua amata ona alia'i mai i le taimi lea.

O tulaga mamafa sa fa'afeagai ma le ali'i Kovana, na atili ona faigata ona o lona soifua maloloina e le atoatoa, ua fa'asolo ina a'afia ona o se gasegase. I le ae maise ai fo'i le le fa'amaoni o lana ofisa sinia, o le ta'ita'i au Lutena o C.S Boucher lea sa 'au ma le Mau e taupulepule e fa'asaga ia te ia. Sa talosaga Kovana Terhune ia suia Boucher mai le tofi i Amerika Samoa ma sa talia loa, ina ua sui tulaga ai le ali'i Ta'ita'i 'Au o A.O. Kali. Ae paga lea, na tutusa lelei lava Kali ma Boucher, le 'au i le Mau ma isi vaega na tete'e ma taupulepule e fa'asaga i le kovana.

Ina ua logo tala le failautusi a le Fua o Joesphus Daniels i nei fa'afitauli e tele, sa ia tofia loa se komisi su'esu'e e fa'auluulu e kapeteni Waldo Evans, ma poloa'ia loa ia aga'i vave i Amerika Samoa i le va'atau o le USS Kansas. A'o aga'i mai la le fa'amasinoga, sa fa'ate'ia le atunu'u ina ua pule Kovana Terhune i lona soifua i le fa'aaogaina o se la'au malosi le fogafale lua o le Maota o le Malo, i totonu o se "potu o lo'o i ai se va'aiga le punitia o le itu i saute i le ulufale mai i le fagaloa." O le fitu o aso talu ona maliu Terhune na tofia ai lo a Kapeteni Evans e fai ma kovana e suia ia.

E na o Terhune lava le kovana o Amerika Samoa ua maliu a o ia umia le tofi, ma e i ai lava tala e fa'apea o lo'o va'aia pea le ali'i o masani ona fealualua'i i le Maota o le Malo i vaitaimi o le ao ma le po.

* * *

Vaega 12: A'oga a Teine, Atauloma, Tupu'aga

Tusia: John Enright

Fa'aliliuina: Eti Sa'aga

O le vaega lenei o le tatou tala fa'asolopito e fai lava sina fa'anoanoa, ona e 14 tausaga o avea Atauloma ma o'u aiga, ona fa'ato ai lea e le Malo o le fale i le 1995 ma fa'amalosia ai le matou o 'ese ma lo'u aiga. O pelega o lenei nofoaga i a te a'u na mafua ai se solo na ou tusia i le taimi sa matou nonofo ai:

O aiga e pei o matua

e po'o le a le umi talu ona uma atu ae tumau pea

e fa'atumuina ai se avanoa e le tatau ona gaogao

i mafaufauga po'o taimi o miti &endash; o le agi a le savili i

ona potu e pei o se leo malu e fa'amatalaina lo'u olaga

ma ua avea fo'i lona to'afimalei ma o'u totino.

Ae ua le na o lenei solo e maua mai ai le tala atoa i a Atauloma. O se tala'aga o lo'o lagona i le tele o si'ufofoga mai lava i le amataga o le foafoaina o lenei nofoaga, toeitiiti nei atoa le seneturi atoa talu ai.

E ui o Ioane Viliamu le ulua'i papalagi misionare na taunu'u mai i Tutuila i le 1832, e o'o atu i le tausaga 1892 ua matua "mao tua" lava le tulaga ua pa'u i ai le LMS (o lenei fa'amaumauga o lo'o maua i talafa'asolopito aloa'ia o le LMS a Peretania). "I tausaga i tua atu o le 1892, e le'i i ai lava se misionare fa'anofo a le LMS i TutuilaÉI le 1892, na amatamata malie ai loa le taumafaiga ina ua o'o mai Epenese Kupa (Ebenezer Vicesimus Cooper), ma na fa'atuatuai le gasologa o le galuega. I le isi 10 tausaga, o le aofa'i o tagata na pa'u'u mai le ekalesia ona o amioga e le tusa ai toeitiiti lava tutusa pe na sili atu fo'i ma le aofa'i o i latou na fa'aekalesiaina i le tele o taimi. O Atauloma la na avea ma fofo na fo'ia ai le tele o le fa'afitauli ma fa'aleleia ai le tulaga sa i ai le taumafaiga i le amataga."

I se isi fa'aupuga, o Atauloma na toe fa'aolaolaina le ekalesia lea ua ta'ua nei o le Ekalesia Fa'apotopotoga Kerisiano i Amerika Samoa (EFKAS), lea e onaina le fale ua fa'atoina nei e le malo.

O le mea sa faia e Misi Kupa, o le tu'u fa'atasia lea o ana faife'au uma i tutuila ma Manu'a i se galuega fai fa'atasi, ma fausia ai loa le a'oga fa'amisionare mo teine i Atauloma, i le pito i sisifo o Afao i Leone, i le falelima i sisifo o Tutuila. E foliga mai sa tu'uina e Misi Kupa le fa'amoemoe i faife'au uma e pei o se lu'i pe latou te mafaia ona fai, aua ina ua mae'a le a'oga i le 1900, sa logoina loa e Misi Kupa fa'atonu o le LMS o lo'o lava le tino i tupe sa sa'ilia ma mauaina (e 1,500 pauni Peretania ma o se tupe tele lea i ia aso) e tagata Samoa, ma e tau le fa'aaogaina le tino i tupe ua uma ona fa'aagaga e le LMS e fauina ai le a'oga.

O le a'oga a tama i Fagalele i Leone sa fa'atuina i le 1855, ma e na o le pau lea o le a'oga tulaga lua sa i ai mo tane o Tutuila ma Manu'a e a'oa'oina ai fa'afaife'au mo le lumana'i. Ae o le tulaga taua i le fa'asologa o le soifuaga fa'asamoa, e tatau lava ona talafeagai le mamalu o le faife'au ma le tulaga o lona faletua, ma sa a'ea ai loa le filifiliga a le ekalesia e tatau ona a'oa'oina fo'i ma faletua aua le feagai ai ma le galuega.

Ae le'i fa'atuina Atauloma i le 1900, o tama'ita'i uma o Tutuila ma Manu'a na tofia mo le fa'amoemoe e fai ma faletua o faife'au sa a'oa'oina i le a'oga a Papauta i tafatafa o Apia, Samoa i Sisifo (ma o le tele o nei teini o alo o ali'i ma matai maualuluga). Sa fai si fa'alelelei o lea tulaga ona o le umi o le taimi na to'esea ai nei tama'ita'i, ma sa faigata ai i le itu o mea e fai ona o le tele o nei tama'ita'i o taupou a o latou aiga. O le isi fo'i itu, o Apia i le vaitaimi lea o se taulaga pito i logologoa le vevesi mai lava i le fa'ai'uga o le 1880, ona o vagatau fa'avaomalo. O le mafua'aga lea na finagalo ai le tele o tamali'i i Tutuila ma Manu'a ia taofiofi mai o latou alo tama'ita'i mai le o atu i Apia.

O le a'oga fou la a Atauloma sa fa'atuina o se fa'ata'ita'iga i le a'oga a Papauta, ma o se pule Peretania o Elisapeta Mua (Elizabeth Moore) na sau mai Upolu e amataina le a'oga.

E fiafai tele le Ofisa o le Fa'asaoina o Measina Fa'asolopito i Amerika Samoa e talia so'o se fa'amatalaga po'o ni tusitusiga mai le mamalu o le atunu'u e uiga i le a'oga a Atauloma, po'o se isi lava vaega o le tala fa'asolopito o Samoa. Fa'amolemole vala'au mai i le telefoni 633-2384.

* * *

Vaega 13: A'oga a Teine i Atauloma, le Nofoaga

Tusia: John Enright

Fa'aliliuina: Eti Sa'aga

O aitu o ni mea mai le taimi ua mavae. Ma afai o lea, o se isi manatu e mafai ona fa'apea, o mea uma ua mavae ma talafa'asolopito e aitua uma. Ma o le tele fo'i o nei "aitu" e pei se a 'i e maua i nofoaga o aso ua mavae. E maua lava aitu i so'o se atunu'u, ma e matele lava i nofoaga ma mea fa'apitoa.

E pei la o Atauloma, lea e lauiloa ona o le aitua.

Ina ua mae'a ona fausia o le A'oga i le 1900, na amataina lona ona fa'ataunu'u ai le fa'amoemoe o le a'oga mo teine. O le tele o tama'ita'i sa a'oa'oina ai o alo o tamali'i o Tutuila ma Manu'a, ma sa le na o teine Samoa na a'o'oga ai. Sa i ai fo'i ma teine mai Toga, Tuvalu, Fiti, Tokelau, ma isi atumotu. O se nofoaga fou ma le matagofie, ma o se mitamitaga e le gata i a Tutuila ma Manu'a, ae mo so'o se tasi na a'oga pe tau fo'i i ai.

O le fale na fausia i sima tetele, ma o e 70 i le 116 futu le lapo'a, ma e ti'eti'e i le pito o le mauga, pe a ma le 40 futu le maualuga mai le talafatai. E tusa ma le 'afa eka atoa na fa'amamaina mo le tulaga ma le lotoa a le a'oga. O le mafiafia o pa sima o le fogafale i lalo e 20 inisi. O le fogafale i luga i ona iviivi sa fausia i laupapa Kalefonia, ma e matua malosi lava.

O le maualuga o le fa'alo o potu i lalo e 14 futu; ae fai lava si la'ititi ifo o le fa'alo i le fogafale i luga. E fa'amalama maualuluga ma faitoto'a ta'ilua le tele o le fale, ma o lo'o si'omia atoa e se fa'apaologa le fale atoa i lalo ma luga.

I le ogatotonu o lo'o i ai se avanoa e ola ai 'ofe, ma e si'omia uma e fa'apaologa. O pou tu sima matagofie, e fa'atumutumu i le lolo'u o le tasi i le isi, e fa'alagolago i ai le fola o le fogafalelua. O le taualuga ma ona fa'atautau ua avea ai le fale atoa ma va'aiga matalasi o le vaitaimi fa'akolone.

Sa avea pea Atauloma ma a'oga a teine o le ekalesia se i a o'o mai i le amataga o le 1960, ma ole tele o tala aitu na mafua ma tupuga mai i tausaga a'o ola le a'oga. E ui ina o tala fa'asamoa i le aitu lauiloa o Tuiatua ma ana asiasiaga mai i Atauloma, o le tele o mea na tutupu i le nofoaga e pei se a'i na mafua ona o mea sa faia e teine i a latou ulaga ma tausuaga i aso ua mavae.

O nei mea na o'o ai ina fasia, lavevea ma oso ai ma'i aitu o ni isi sa a'o'oga ai. O se tala ta'atele e fa'apea e matua leai lava se fofo po'o se togafiti fa'apapalagi e mafai ona faia i se tasi pe a fasia mai i tulaga fa'apenei, vagana ai fofo Samoa.

I tua atu i le vao e le mamao tele ma le a'oga o lo'o i ai se fanua tanu, ma o lo'o i ai ni tu'ugamau anamua pe a ma le 20. O nei tu'ugamau e 'ese'ese o latou lapopo'a. O le tala e fa'apea o i latou nei o ni isi na maliliu i se fa'ama'i, ma sa le fa'afo'ia o latou tino maliu i latou nu'u moni ae tanumia i i ona o puipuiga i le pepesi o le fa'ama'i. E fa'apea la o latou aitu ia e fa'asaolo solo nei i Atauloma.

I le 1970, sa lisiina loa e Ie Malo o Amerika Samoa le fale, ma toe fa'afouina ai e avea ma fale noofo o papalagi konekarate a le Malo mai fafo. Ae sa tumau pea aitu o teine, ma i le tele o tausaga na nonofo ai papalagi i Atauloma, na latou va'aia ma talitonuina ai le moni o le i ai o aitu. I le sefulu tausaga mulimuli o le lisi, sa le'i toe galuea'ina pe fa'afouina e le malo le fale. Na o'o ai lava i le 1995, ua fa'atoina ona ua le saogalemu le fale atoa mo le toe nofoia e ni tagata ola. Sa fa'aleaogaina loa e le EFKAS le lisi, ma toe ave Atauloma, ae ua fai si tuai.

I le talitonuga fa'afolopito o nofoaga fa'apea, e fa'avalu ona taugofie atu le tausia lelei pea o se fale na i lo le toe fausia atoa. O lo'o galulue nei le Ofisa Fa'asao o Measina Fa'asolopito ma le EFKAS i ni auala e toe fa'amautuina ma atoatoa ai le matalasi sa pele i ai Atauloma i aso ua mavae i a Tutuila ma Manu'a. A fai e te fia fesoasoani, vala'au mai i le 633-2384, ma e fa'afetai tele atu teine o le a'oga.